سلام عليكم يا سيدي مارحبا بيكم في ها المدونة إلي بش تكتشفو فيها يوميات واحد تونسي زوالي. حياتو تشبه برشا لحياة أي واحد تونسي زوالي اما أنا خطرتلى باش نكتب يومياتي على خاطر ديما أي واحد زوالي كيفي حياتو تشبه بارشا لمووغامارات كلينت ايستوود ولا دون كيشوت. المهم أنا ياسيدي بعد ماكملت لقريا فل جامعة و خذيت هاك الورقة الغالية بارشا و إلي صرفت عليها بارشا فلووس و خمسة سنين من عمري بخلاف الدخان إلي تكيفتو وقت ريفيسيون و إلي ما يفوتش بارشا دخان قطار تونس سوسة متاع شركة السكك الحديدية التونسية مشيت نفركس على خدمة و وقتها عرفت إلي لي كنت نعمل فيه لكل زايد و إلي لقريا في تونس تنجم تقول حكاية زايدة و تفكرت مرة واحد صاحبي الله يذكرو بالخير هو كنترولر متاع ميترو شدني مرسكى وقت إلي سيبني قالي برا انتوما باش يدورو بيكم الإقتصاد. اما برسمى كلامو طلع صحيح و طلعت انا مغفل كيما برشا توانسا .
